الثلاثاء، 17 يونيو 2025

مطرب الراب محمد أسامة ينشر تجربته مع ألبوم مايكل جاكسون " لا يُقهر "


 نشر مطرب الراب والمنتج الموسيقي ومؤلف الأغانى ‏محمد أسامة تجربته الشخصية وتحليله لألبوم المُغنى العالمى الراحل مايكل جاكسون الأخير "Invincible لا يُقهر"، حيث يصطحبنا معه فى "بوست" مطول وممتع حول أغانى الألبوم المكون من 16 أغنية، فيتحدث عن كل أغنيه بالألبوم من موسيقى وكلمات وخلفيات تتعلق بالسياق التارخى لأغانى مايكل ...

يصف لنا مطرب الراب المعروف محمد أسامة أجواء صدور" لا يُقهر "العامة والخاصة، قائلاً : في أواخر سنة 2001 ، نزلت من بيتنا في المنصورة رايح السكة الجديدة لمحل اسمه "صلاح و محمد" بعد ما شفت إعلان في التلفزيون أن شريط مايكل جاكسون الجديد أخيرًا نزل في مصر .


شريط جديد بعد ست سنين عجاف مستنيه من سنة 1995 ، فورًا دخلت المحل اسأل ع الشريط لقيته بـ 18 جنيه ! ، قلت مش خسارة في مايكل حبيبي واستلمت الشريط ، كان شكله يهوس ومكتوب عليه اسم كلمة مايكل جاكسون بشكل ديجيتال "رقمي"، و تحت بخط صغير اسم الألبوم : Invincible" لا يُقهر" !

والبوستر تصميمه مودرن تحس أنه من المستقبل أبيض و أسود و الشريط نفسه كان شفاف ومن جواه الطبقة السودة أللي بتكون دايماً موجودة في شرايط الكاسيت، والتفاصيل على الشريط نفسه مكتوبة بالأبيض والمنظر العام للعلبة بالشريط والتصاميم بتقول أني هتكيف النهاردة، رجعت البيت جري استنيت لما أبويا خرج عشان كان بينزعج من المزيكا العالية، وقمت ساحب الكاسيت بلاير صديقي و رفيقي، كان "باناسونيك" أسود بسماعتين جودتهم كويسة أوي بالنسبة للفترة الزمنية وكنت أحب احطه قدامي ع الترابيزة بزاوية مُعينة، بحيث تكون راسي في النص بين السماعتين عشان أقدر اسمع تفاصيل المزيكا واتمتع بيها (حاجات هيفهمها بتوع استديوهات الصوت)، فتحت العلبة وبدأت اتفرج ع التصميم بالأبيض والأسود بشكل باهت كأنه مرسوم بافكت ألوان زيت و صفحة كاملة بالأبيض مكتوبة بالأسود الأغاني و كلماتها و اسماء اللي اشتغلو في الألبوم وأللي ساهموا في انتاجه و كلام من توقيع مايكل جاكسون زي شكر خاص لكل أللي ساعدوه ..


الألبوم كان 16 أغنية، فقلت لأ بقى أنا النهاردة هتمتع متعة هتقعد معايا كتير !

 

طلعت الشريط الجميل من العلبة وحطيته ع الوش الأول بدات رحلتي مع الشريط ..

 

🎵الوجه الأول

🔸الأغنية الأولى Unbreakable


صمت مع افتكات سينمائية عجيبة تصاعدية عشان تبدأ فجاة لوباية مزيكا بآلة غريبة بتتكرر كاتشي جدًا جدًا لدرجة انك ممكن تفضل تعيد فيها طول الوقت مع "بيت بوم باب بكيك تقيلة" مناسبة للحقبة الزمنية دي ، بلا إرادة قعدت أهز دماغي مع المزيكا و أنا مبتسم بلا وعي و بدأت المزيكا تتصاعد بخلفية سينمائية عشان تبدأ تجليات صوتية لمايكل وهو بيستعد قبل ما يخش باول جملة : Now I'm just wondering why you think

متعة بقى يا عزيزي، خرجت من الواقع عشان اطير في عالم موازي وفجاة الاقي صوت الأسطورة الراحل بيجي سمولز بنفسه بيرص فيرس راب على هذا البيت الممتع وجالي الشعور أن دي هتبقى أجمد أغنية في الشريط ، لدرجة إنى شغلتها تاني مرتين من جمالها ..
كلمات الأغنية عبارة عن رسالة تحدي وصمود ضد كل أللي هاجموه، وبيؤكد فيها إنه أقوى من الشائعات والمحن، وإنه مش هينهزم أبدًا. هي افتتاحية نارية بتقول "أنا لسه هنا، ومش هتقّدروا تكسروني".

 

🔸الأغنية التانية Heartbreaker

بعد 2010 بدأت تظر جونرة مزيكا مختلفة هي الدوبستيب بيت و التراب بيت، خليني أقولك يا عزيزي إن مايكل جاكسون عملها في 2001 !

الأغنية بتبدأ بـ "بيت دوبستيب وكيك تقيلة" بعيدة شوية عن المرحلة دي كأنه ركب آلة زمن بيعمل موسيقى مستقبلية بآلات عجيبة تشبه أصوات "ايرورز الكمبيوترات" في أفلام هوليود في آواخر التسعينات، بتتوفق في قالب إيقاعي فريد من نوعه الحقيقة، أغنية مختلفة جدًا لا تخلو من "فيرس راب" رايق يزيدها وهجاً .

كلمات الأغنية بتحكي عن خيانة عاطفية من فتاة لعوب، مايكل بيحذر منها وبيعبر عن ألمه واندهاشه من خداعها. الرسالة : "وقعت في حبك وكسرتي قلبي، بس كنتي لعبة خطيرة من البداية".

 

🔸الأغنية التالتة Invincible

من أغرب التوزيعاات أللي سمعتها في مسيرة مايكل من شغل "رودني جيركنز"، لوباية بتتعاد ع البيت البوم باب ، خطوط المزيكا قليلة تتعد ع الصوابع ، بيحصل تصاعد في التلت الآخير من الأغنية قبل "فيرس الراب" بشكل مُتعارف عليه من مايكل في أغاني كتير لما بيعمل كسر متعمد للحالة عشان يرجع لها تاني.

الكلمات بتعبر عن حب مايكل لفتاة قوية ومستقلة، لكنه بيحاول يقول لها إنه رغم قوتها الظاهرة، هو برضو مش ضعيف ومش هيتكسر بسهولة. المعنى: "أنا مش خصم سهل… حتى لو قلبي معاك، أنا برضو لا يُقهَر".

 

🔸الأغنية الرابعة Break of Dawn

تتميز بموسيقى هادئة وحالمة من نوع R&B الناعم، بتعتمد على بيانو كهربائي دافئ، خطوط باس سلسة، وإيقاع بطيء رومانسي. الأجواء كلها ليلية وحسية، بتحاكي لحظة حب هادئة بعد الفجر، وصوت مايكل ناعم وهمسي بيضيف حميمية ودفء للأغنية. حالتها أقرب لحلم رومانسي ساكن، مليان شوق وطمأنينة. من أحلى أغاني الألبوم و عيدتها مرتين

الكلمات بتحكي عن لحظة حب حميمة بين حبيبين في هدوء الليل، واشتياق مايكل لقضاء الوقت مع حبيبته حتى طلوع الفجر. الأغنية مليانة رومانسية وشغف، وبتعبر عن رغبة في الهروب من العالم والذوبان في لحظة دافية معاها.

 

🔸الأغنية الخامسة Heaven Can Wait

بتتميز بموسيقى R&B ناعمة وغنية بالإحساس، مع إيقاع بطيء وهادئ، وخلفية صوتية دافئة مكونة من بيز ناعم، سنير خفيف، وأوتار خافتة بتضيف لمسة حالمة. صوت مايكل جاكسون فيها رقيق ومليان شجن، وبيغني بأداء عاطفي جداً يوصل إحساس الحب العميق والتعلق. الحالة العامة للأغنية رومانسية حزينة، كأنها صلاة عاشق بيتوسل إن الزمن يوقف علشان يفضل مع أللي بيحبها، حتى لو السما لازم تستنى.

الكلمات بتعبر عن حب عميق لدرجة إن مايكل بيقول إنه حتى لو السما بتناديه، هو مش عايز يسيب حبيبته. الموضوع عن التعلق الشديد والاختيار الواعي إن الحياة معاها أهم من أي نعيم تاني.

 

🔸الأغنية السادسة You Rock My World

بتجمع بين إيقاعات الـ R&B والـFunk بأسلوب مايكل جاكسون الكلاسيكي، مع بيز لاين راقص، جيتار فاونكي، وإيقاع متوسط السرعة يخليها جذابة وسهلة الرقص. المزيكا فيها طاقة خفيفة ومغرية، وصوت مايكل حيوي ومليان شغف، كأنه بيغازل الحبيبة بإيقاع موسيقي ناعم وحسي. حالتها رومانسية مرحة، فيها طابع شبابي وجاذبية.

أما عن الشهرة، فالأغنية كانت أنجح سينجل في ألبوم Invincible، وحققت انتشارًا عالميًا، خاصة بسبب الكليب الطويل اللي شارك فيه كريس تاكر، وأللي أعاد للمشاهدين أجواء مايكل السينمائية في كليباته الكلاسيكية زي "Smooth Criminal".

 

🔸الأغنية السابعة Butterflies

هي واحدة من أرقى وأهدأ لحظات ألبوم Invincible، بتتميز بموسيقى R&B ناعمة مستوحاة من السول الكلاسيكي، مع بيانو خفيف، خط باس دافئ، بيت بسيط جداً بيركّز على الإحساس أكتر من الإيقاع. صوت مايكل فيها حنون وعاطفي، مليان (صوت عالي ناعم) بيعبّر عن توتر المشاعر في بداية الحب. حالتها حالمة ورقيقة، كأنها إحساس "الفراشات في المعدة" أول ما تحب حد ومتبقاش قادر تعبّر له.

الكلمات بتحكي عن إحساس الحب الخجول اللي لسه بيتكوّن، لما تكون معجب بحد ومش قادر تقول له، لكن مشاعرك بتتزايد. الأغنية بتعبّر عن الإرتباك الجميل والحنين أللي بيجي مع بداية التعلق.

 

🔸الأغنية التامنة Speechless

أغنية بالاد رومانسية خالصة، بتبدأ بدون آلات، فقط بصوت مايكل جاكسون النقي في مقطع a cappella، وبعدين تدخل الآلات بهدوء مع بيانو كلاسيكي، كمنجات دافئة، وخلفية موسيقية سينمائية. الأغنية حالتها روحانية وعاطفية جدًا، صوت مايكل فيها صادق وضعيف بشكل جميل، كأنه بيبوح بمشاعر حب عميقة عاجز عن وصفها بالكلام. مزيكتها بسيطة لكن مؤثرة، تلامس القلب بهدوء وأناقة.

الكلمات بتعبّر عن حب عميق جدًا يخلي مايكل عاجز عن التعبير، كأن الكلمات نفسها مش كفاية توصف مشاعره. الأغنية بتجسد لحظة حب صافية لدرجة إن الصمت فيها أبلغ من الكلام.

 

خلصت الوش الأول من الشريط وأنا منبهر و في حالة فنية حالمة، أقوم قالب الشريط ع الوش التاني عشان نخش على التمن أغاني التانيين ..

 

🎵الوجه التاني :


🔸الأغنية الأولى 2000 Watts

أكثر تراك تجريبي في ألبوم Invincible، بموسيقى إلكترونية ثقيلة، وإيقاع متين من نوع electro-R&B مع تأثيرات صناعية واضحة وbeat شبه ميكانيكي. صوت مايكل فيها متحوّل ومفلتر (باستخدام pitch shifting)، بيخليه أغمق وأقرب لصوت روبوتي، في تجربة صوتية غير معتادة منه. حالتها مستقبلية، فيها طاقة عالية وإحساس تكنولوجي بارد، كأنها من عالم إلكتروني أو غرفة تحكم رقمية، مختلفة تمامًا عن طابع الألبوم الرومانسي.

صوت مايكل في الأغنية دي أنا مش متأكد ملعوب فيها عشان يكون أعمق و لا ممكن ده يكون صوت مايكل الحقيقي !

الكلمات بتدور حول القوة، التكنولوجيا، والمتعة الحسية المكثفة، كأن مايكل بيوصف تجربة حب أو رغبة بشكل رمزي باستخدام صور كهربائية وعالية الطاقة. الأغنية بتربط بين الجاذبية الجسدية والتكنولوجيا الحديثة في قالب جريء وغير تقليدي.

 

🔸الأغنية التانية You Are My Life

بالاد رومانسي دافئ ، بتتكوّن من توزيع بسيط وهادئ يعتمد على البيانو والأوتار، مع إيقاع ناعم يخلي التركيز كله على صوت مايكل. الحالة الموسيقية فيها حنية ودفء، وبتدي إحساس بالعرفان والراحة، كأنها رسالة حب نقي وعميق. صوت مايكل هنا صادق وعاطفي بشكل واضح، بيغني بإحساس أبوي أو روحي، مش بس عاطفي، كأنه بيحكي عن شخص هو كل حياته.

الكلمات بتعبّر عن امتنان مايكل لشخص أنقذه من الوحدة وأعطى لحياته معنى، كأنه بيقول: "وجودك هو سبب سعادتي وبدونك ماكنتش هبقى أنا". الأغنية رسالة حب صافية مليانة دفء وامتنان.

 

🔸الأغنية التالتة Privacy

بتتميز بموسيقى هجومية وإلكترونية الطابع، تمزج بين الـR&B والـRock، بإيقاع ثقيل، جيتارات صاخبة، وBeat متوتر يعكس حالة الغضب. صوت مايكل فيها حاد وساخر، وبيستخدم صرخات وهتافات بشكل مسرحي. الحالة العامة للأغنية غاضبة وعصبية، كأنها انفجار ضد اختراق الإعلام لحياته، ورفضه المستمر لمطاردة الصحافة والتجسس عليه. المزيكا بتعكس الإحساس بالضغط والقهر، لكنها كمان مليانة طاقة وتمرد .

الكلمات صرخة غضب من مايكل جاكسون ضد تدخل الإعلام في حياته الشخصية، ورفضه المطاردة المستمرة من المصورين والصحافة. الأغنية بتطالب باحترام خصوصيته كإنسان، مش كسلعة تحت المجهر.

 

🔸الاغنية الرابعة Don't Walk Away

بالاد حزينة بموسيقى R&B هادئة وكلاسيكية تعتمد على البيانو والوتريات الدافئة، مع إيقاع بطيء جداً يضيف جو من الانكسار والتأمل. صوت مايكل ناعم ومليان شجن، كأنه بيحاول يمنع شخص بيحبه من الرحيل، وبيغني بكلمات بسيطة لكن مؤثرة. حالتها عاطفية حزينة، مليانة ألم الفقد والتوسل، وكأنها آخر محاولة لإنقاذ حب بيضيع.

الكلمات بتعبّر عن رجاء حزين من مايكل لحبيبته إنها ما تسيبهوش، وبيقول لها إن الرحيل هيدمّره. الأغنية بتجسد لحظة ضعف وحنين، فيها تمسّك يائس بالعلاقة قبل ما تنهار.

 

🔸الأغنية الخامسة Cry

بتتميز بموسيقى بالاد ملحمية وعاطفية، بإيقاع بطيء، بيانو عاطفي، وكورال خلفي ضخم يديها طابع جماعي روحاني. التوزيع بسيط لكنه مؤثر، بيخلق إحساس بالحزن والأمل في نفس الوقت. صوت مايكل جاكسون فيها صادق ومليان إحساس، كأنه بينادي للعالم كله، مش بس لشخص معيّن. حالتها إنسانية وتأملية، فيها دعوة للوحدة والتغيير، وبتلمّس مواضيع زي الألم الجماعي، الظلم، وأمل التغيير لو اتحدنا.

الكلمات بتتكلم عن الألم اللي بيعيشه العالم، وعن الإحساس بالعجز قدّامه، لكن بتوصل رسالة أمل إننا لو اتحدنا نقدر نغير. الأغنية دعوة إنسانية للبكاء معًا مش ضعف، بل بداية للتغيير الحقيقي.

 

🔸الأغنية السادسة The Lost Children

بتتميز بموسيقى بسيطة وناعمة أقرب لحكاية قبل النوم، بإيقاع هادئ، نغمات بيانو دافئة، وأصوات أطفال في الخلفية بتضيف جو طفولي وإنساني. صوت مايكل جاكسون فيها حنون جدًا، كأنه بيحكي قصة بحب ورعاية. حالتها عاطفية ومليانة تعاطف، بتحمل حزن دفين لكنه مغلف بالرحمة، وبتوصل إحساس مايكل العميق بحب الأطفال واهتمامه بمعاناة الصغار المنسيين.


الاغنية دي من أجمل الالحان في الالبوم

الكلمات بتحكي عن الأطفال المنسيين والضايعين في العالم، وبتعبر عن حزن مايكل وتعاطفه معاهم. الأغنية رسالة حب وحنان، ونداء للعالم إنه يفتّش عن البراءة اللي اتخذت منها الطفولة.

 

🔸الأغنية السابعة Whatever Happens"

واحدة من أروع التراكات من حيث التوزيع والإحساس، بموسيقى R&B ناعمة ممزوجة بعناصر لاتينية مميزة، أبرزها مشاركة الأسطورة كارلوس سانتانا بعزف جيتار كهربائي تعبيري رائع. الأغنية حالتها درامية وعاطفية، بيغلب عليها التوتر العاطفي والحيرة بين اتنين بيحاولوا يكملوا علاقتهم رغم الصعوبات. صوت مايكل مليان شجن وهدوء، والتوزيع الموسيقي غني بالطبقات والإحساس، خصوصًا مع لمسة الجيتار اللي بتضيف عمق وروح للأغنية. ورغم إنها ما نزلتش كـ"سينجل"، لكنها لاقت تقدير كبير من الجمهور والنقاد، وبتُعتبر واحدة من الجواهر الدفينة في الألبوم

 

🔸الأغنية الأخيرة في الشريط Threatened

موسيقى مظلمة وتجريبية تمزج بين الـ Hip-Hop والـ Industrial Pop، بإيقاع قوي، Beat عنيف، وأصوات مؤثرات مرعبة (زي صرخات وهمسات). بيستخدم مايكل فيها spoken word مقتبس بصوت الممثل Rod Serling (من سلسلة "The Twilight Zone")، وده بيديها جو سينمائي غامض. حالتها متوترة ومليانة تشويق، كأنها فيلم رعب موسيقي، وبيظهر فيها مايكل كشخص "خطير" بيتحدى كل اللي بيخافوه أو بيحاولوا يهاجموه. أغنية غير تقليدية، بتختم الألبوم بشكل مفاجئ وجريء.

 

.. ويُعلق مطرب الراب محمد أسامة، قائلاً : باناسونيك أجمل أيام
العمر 
❤️ ده اللي سمعت فيه الشريط لأول مرة

🌀 الشريط خلص .. وبدأ من جديد
أنتهى الشريط عشان أشغله تاني وتالت وانزل فيه تفصيص على مدار أسبوع أمتد لشهر وسنين قدام بعدها لحد اللحظة أللي بكلمكو فيها ده واحد من أقرب الألبومات إلى قلبي وفضلت سنين طويلة مستغرب جداً هو ليه محدش بيسمع الألبوم ده و ليه محدش عارفه وليه مخدش أي شهرة مقارنة باعمال مايكل أللي قبله رغم إن المستوى الفني من وجهة نظري التي لا قيمة لها إنه أحسن مزيكا قدمها مايكل جاكسون في مسيرته الفنية !


الألبوم مفيهوش غلطة وفيه أغاني معمولة لا تنتمي أبدًا لزمنها ! و فيه أغاني لو سمعتها دلوقت مش هتصدق إنها صدرت سنة 2001 !
حاولت أفهم السبب من خلال الإنترنت أيامها وكل أللي قدرت أفهمه إن شركة سوني ميوزيك المنتجة والموزعة للألبوم معملوش تسويق محترم ولا وافقوا يمولوا كليبات الأغاني غير تقريبًا كليب واحد هو !You Rock My World


قيل أيضا ان مايكل دخل في مشاكل قضائية بعدها مع الشركة دي و توالت المشاكل و الحوارات حتى رحل مايكل جاكسون عن العالم في 2009 ، ليجعل من الألبوم ده هو آخر البوم رسمي في مسيرته الفنية ، البوم اتظلم ظُلم بيّن و كل ما كنت اكلم حد عن مايكل جاكسون و يطلع من محبيه ميكونش على دراية كافية أو حتى مهتم أوي بالألبوم ده و بيشوفو البوم مش اد كده فيزيد جنوني لفهم اللغز
الألبوم صدر في 30 أكتوبر 2001 يعني بعد أحداث 11 سبتمبر و ده ممكن إلى حد ما يفسر إن المزاج الأمريكي ممكن مكانش وقتها مناسب لصدور الألبوم.


ميزانية انتاج الألبوم ده كانت 30 مليون دولار! و مايكل جاكسون فضل يشتغل على الألبوم ده من سنة 1997 لحد سنة 2001 !
 
أنا بصراحة بعشق ألبوم Invincible، وبشوفه واحد من أعظم وأصدق ما قدم الأسطورة الحية مايكل جاكسون. يمكن ماخدش حقه وقت ما نزل، ويمكن الناس ركزت على الصراعات حوالين الألبوم أكتر من محتواه، لكن بالنسبالي هو حالة فنية كاملة - مزيكا، إحساس، وصدق ملوش زي.

 

علشان كده قررت أتكلم عنه بطريقتي، وأحكي حكايتي مع ألبوم فعلاً لمَسني، وهفضل أسمعه دايمًا لأنه ببساطة يستاهل يعيش 🎧

 


 

ليست هناك تعليقات:

إرسال تعليق